Arnaldur      Grétarsson

Nýlega tók ég til í vistarverum mínum og uppgötvaði að ýmislegt var ekki þar sem að það átti að vera. Hlutir sem að hafa verið miklir gleðivaldar í lífi mínu í gegnum tíðina. Eitthvað af þessu var nú lánað út áður en að ég fluttist búferlum til Baunalandsins góða, til einstaklinga sem að nú eru gleymdir. Aftur á móti datt mér í hug að nota tækifærið og lýsa eftir þessum munum hér og reyna að hvetja fólk til að rétt líta í gegnum föggur sínar og athuga hvort að þessir hlutir dúkka upp þar einhverstaðar.

Allar ábendingar um örlög þessara hluta eru vel þegnar og ábendingar um aðra hluti sem ég kynni að eiga, og hafa dagað uppi hjá fólki, gætu jafnvel verið enn betur þegnar. Einnig er vert að minnast þess að fólki er frjálst að gera eignarhaldskröfur í innbú mitt, ef það telur, og getur fært rök fyrir, að það eigi rétt á sér.

Í fljótu bragði er listinn eftirfarandi:

Nintendo 64 leikjatölvan mín. Ég man að ég lánaði einhverjum hana áður en að ég flutti út, en ekki hverjum.	Back to the Future tríólógían. Ég veit nú reyndar nokkurnvegin hvar hún er niðurkomin.	Hver er með The Fast Show, season 1!
The X-files, season 1 á VHS formati. Ég yrði þakklátur fyrir ábendingar. Season 2 og 3 eru einmana.	Black Adder Series 1 og 2 í double deluxe twin cover, á VHS formati. Hér er einungis mynd af seríu 2 en sería eitt er svipuð í útliti. Ef smellt er á myndina má sjá hvernig seríurnar í þessarri línu líta út, að seríu eitt undanskilinni, sem að ekki er með á myndinni einhverra hluta vegna.	The Beach, skáldsaga eftir Alex Garland. Stórkostlega skemmtileg bók, eins og fleira eftir Garland. Ég mæli eindregið með að fólk lesi þessa bók, bara ekki eintakið mitt nema að það láti mig vita. (Og já, ég veit að myndin var eins og slæm eftirlíking af hundaskít.)

Já, þannig er nú það. Og í ljósi þessa vil ég hér nota tækifærið og minnast góðra félaga sem hafa fallið frá á undangengnum árum. Þessir félagar munu lifa í minningunni, sem mikilfengnir gripir þó að um þá sé eflaust farið illum höndum í skúmaskotum mannlegs samfélags á þessari stundu.

Þessir félagar eru:

Já, hér gefur að líta samansafn af bókum um Gaulverjann frækna Ástrík. Bækurnar sem að um ræðir voru fyrstu útgáfur á ensku, sumar hverjar, og því illbætanlegar.

Hér hefði átt að vera mynd af fallegum ólífugrænum og bláum anorak, sem að kenndur var við Jamie Lynn, snjóbrettahetju, og var framleiddur af Sessions, snjóbrettafyrirtæki. Í staðinn er sessions logo-ið

Megi slæmt líf bíða þeirra sem tóku þessa kæru vini frá mér, ófrjálsri hendi og megi þeirra niðjar líða vítiskvalir á meðan á þeirra jarðlífi stendur um komandi kynslóðir.

(Þó skal getið að þeim þjófóttu einstaklingum sem að kynnu að hafa Ástrík og Jamie Lynn jakkann undir höndum, mun þegar fyrirgefið og verðlaunað, skyldu þeir sýna þann stórhug að koma fram og láta mér þá í té.)