Arnaldur      Grétarsson

Ég var að lesa mér til um Geir Haarde á Wikipedia þegar ég rakst á þessa mynd af þessari hálf hallærislegu sendinefnd sem fór til Washington að betla út lengri dvöl fyrir Bandaríkjaher.

Þetta minnti mig á skopteikningu sem gerði þessum sendiferðum skil, sem ég teiknaði um svipað leyti eftir pöntun frá Hjalta Snæ. Ég byggði skopteikninguna á frægri myndskreytingu eftir George Cruikshank við Oliver Twist.

Á myndinni minni hafði ég skipt Oliver Twist út fyrir Geir Haarde. George Bush Jr. og Donald Rumsfeld voru þá í hlutverki forsvarsmanna munaðarleysingjaheimilisins. Í bakgrunninn mátti svo sjá Valgerði, Halldór Ásgrímsson og Björn Bjarnason, í hlutverki hinna munaðarleysingjanna.

Ég hef alltaf verið nokkuð ánægður með mína útgáfu, enda var hún velheppnuð og skírskotunin leyndi sér ekki. Ég notaði hana meira að segja í BA-ritgerðina mína, sem dæmi um pólitíska ádeiluskopmynd. Ég varð því nokkuð leiður þegar ég uppgötvaði að ég hef glatað myndinni. Hún finnst hvergi á tölvutæku formi, og upprunalega blýantsteikningin er orðin svo máð að hún er nokkurn vegin óþekkjanleg.

Maður hefði haldið að það væri í lófa lagið að heimta myndina úr BA-ritgerðinni sjálfri, en mér til enn frekari hryllings uppgötvaði ég að ég hef einnig glatað öllum útgáfum af BA ritgerðinni minni, nema frum-uppkastinu.

Þetta er nú aldeilis svekkelsi.