Arnaldur      Grétarsson

Ég hef lengi verið mikill aðdáandi sjónvarpsþáttanna Tvídranga (e. Twin Peaks) og öllu sem þeim tengist. Nú eru reyndar sennilega orðin eitthvað um 10 ár síðan ég horfði síðast á seríurnar (og FWWM), en ég ætla að bæta úr því á allra næstu dögum.

Ég tók mig til á dögunum og útbjó spilastokk sem er innblásinn af Twin Peaks þáttunum, enda er þar af nógu að taka; hvort sem maður sækir í karakter galleríið, umgjörð þáttanna, eða symbólíkina sem birtist manni.

Reyndar er ekki um fullbúinn 52 spila stokk að ræða (enn sem komið er). Ég lét mér nægja að gera nokkur mannspil, Jókera, og eitt talnaspil. Svo er auðvitað líka bakhliðin klár, en ég byrjaði að sjálfsögðu á henni.

Ég var nokkuð ánægður með heildarútkomuna, þótt viss spil séu í meira uppáhaldi hjá mér en önnur. T.a.m. hefði mér þótt drottningar-spilið mátt heppnast betur, og ásinn kom ekki sérlega vel út þegar ég blekaði hann.

Aftur á móti þótti mér bakhliðin heppnast betur en ég átti von á, og ég er sérdeilis ánægður með annan jókerinn ('The Man from Another Place').

Upphaflega ætlaði ég að gera öllum sortunum skil, en ég ákvað viljandi að bíða með tígulinn. Ég gat ekki ákveðið mig með það hvernig ég vildi útfæra þá sort, þótt að ég sé nú eiginlega kominn að endanlegri niðurstöðu núna.

Ef ég klára einhverntíman stokkinn, þá kannski framleiði ég nokkur eintök. Áhugasamir um eineygða gosann geta þá haft samband.

Twin Peaks aðdáendur, njótið!